Simu Fax

Ema nain tolu, ida husi Australia, ida husi Japaun, no ida seluk husi Timor. Sira nain tolu iha hela sauna (fatin klot nebe ema dezenha espesial ba ema nebe hakarak manas no hakarak kosar iha laran. Bai-bain ema tama uza los deit mak handuk, dala barak molik).

Tur hela menikmati sauna nebe manas, derrepente iha lian ida hanesan ema telefone. Maluk Australia ne’e hanehan nia liman kabun, depois foti nia liman kabun ba oin hodi koalia ho ema ruma. Sira seluk hare deit ho konfuzaun boot. Wainhira remata sira husu  los saida mak ne’e?
     "Oh, ohin ne’e hau nia skype. "hatan Australiano ne’e, "hau iha microchip ida nebe tau iha kulit nia okos, iha liman ne’e." Ida Timor oan ne’e admira los, woow, ema dezenvolvidu los, skype uza liman deit.

Lia tiha minute ida ka rua, telefone ida lian tan dala ida. Maluk Japaun ne’e foti nia liman laran tau ba nia tilun hodi koalia. Wainhira nia remata nia explika, "Oh, ohin ne’e hau nia handphone. Hau mos iha microchip iha hau nia liman laran."

Timor oan ne’e sente laiha buat ida mak nia atu hatudu maibé nia lakohi lakon, Nia mos hakarak hatudu buat ruma husi Timor nian nebe impresivu. Nia sai husi kuartu sauna ne’e hodi ba haris fatin (toilet). Wainhira fila fali mai husi haris fatin, nia la’o molik deit, maibe iha surat tahan (kertas tissue) ida tabele hela iha nia kidun kuak. Maluk Australianu ho Japaun ne’e foti matan haré bila’an saida mak ne’e. Timor oan ne’e ikus mai explika"sim, Imi la hare ka? Hau foin simu fax husi Timor."