Donor ran

António ho Maria hadomi malu los. Fulan tolu liu ba Maria hetan asidente no besik atu mate. Ran fakar sai barak los. Doutor dehan Maria hein mate deit, tamba ran rezerva iha banku ran Ospitál nasional la cocok ho Maria nia ran. Maria mos la loke matan (kondisaun koma) kuaze oras tolu ona. Tamba hanoin los, António husu atu cek nia-an, karik nia ran hanesan ho Maria nian. Sorte los, doben António nia ran hanesan. Tan ne’e, António donor nia ran kuaze litru tolu.

Ho doasaun ran husi António, grasas a Deus, Maria neneik loke fali matan, no ikus mai diak fali. Liu tiha fulan rua, Maria alta husi ospitál.

Alta tiha fulan ida, Maria derrepente hakarak atu hakotu sira nia domin alias putus. António laran moras los. Mas Maria la muda nia hanoin, tamba dehan katak sira la cocok ba malu ona. Maria hakarak putus duni.
“Possa, o la hanoin hau? Hau sakrifisiu los ba O. O ne’e sorte ho hau, hau la donor karik hau nia ran, o mate tiha ona.” António komentar la puas liu.
“António, Ita memang la cocok ona, it’rua moris hamutuk mos ulun moras hela deit.” Maria hatan fali.
Diskuti ba mai mos hanesan deit, Maria hakarak putus nafatin. Labele ona, ANtónio dehan deit, “Entaun laiha buat ida, se O hakarak ita putus duni. Mas hau hakarak O selu fali hau nia ran ne’ebé hau donor ba O. O tenki selu fila fali.”
Rona ida ne’e, Maria halai kedas ba uma laran. Liu minutu 5, Maria sai fali mai, tuda plastik oan ida ba António hodi dehan, “ne’e simu uluk ne’e ba. Selu hotu dala ida mak hau labele, maibé hau fo cicilan deit. Ful-fulan mak hau entrega. Ida ne’e pagamentu primeiru.”
António loke ba haré Softex uzadu ida ne’ebé nakonu hela ho ran.
“Lori uluk ne’e ba. Ful-fulan mak hau selu restu ne’e.”

António ulun moras kedas.